فضائی آلودگی کے صحت پر اثرات سے متعلق ایک تحقیق میں آلودہ ہوا اور ٹائپ 2 ذیابیطس کے درمیان تعلق سامنے آیا ہے۔
برطانوی اخبار ’دی گارڈین‘ کی رپورٹ کے مطابق بھارت کے دارالحکومت دہلی اور جنوبی شہر چنئی میں ہونے والی تحقیق میں پایا گیا کہ PM2.5 ذرات سے زیادہ متاثرہ ہوا میں سانس لینے کے ساتھ خون میں شوگر کی سطح اور ذیابیطس کا خطرہ بڑھ سکتا ہے۔
PM2.5 ایسے باریک ذرات ہیں جو بال کی موٹائی سے تقریباً 30 گنا چھوٹے ہوتے ہیں۔ سانس کے ذریعے یہ پھیپھڑوں میں پہنچنے کے بعد خون میں داخل ہوسکتے ہیں اور نظامِ تنفس و قلب کو متاثر کرسکتے ہیں۔
تحقیق کے مصنفین میں شامل ماہرِ امراضِ قلب ڈاکٹر ڈوریراج پربھاکرن کے مطابق ان ذرات میں سلفیٹ، نائٹریٹ، بھاری دھاتیں اور بلیک کاربن شامل ہوسکتے ہیں، جو خون کی نالیوں کی اندرونی تہہ کو نقصان پہنچانے، شریانوں کو سخت کرنے اور بلڈ پریشر بڑھانے میں کردار ادا کرسکتے ہیں۔ یہ ذرات جسم میں سوزش اور دل کے پٹھوں پر اثرات سے بھی وابستہ ہیں۔